«Бір ел-бір кітап» -2015 жыл таңдауы "Көшпенділер" трилогиясы

«Бір ел-бір кітап» -2015 жыл таңдауы "Көшпенділер" трилогиясы

«Бір ел –бір кітап» акциясын ұйымдастыру комиссиясының шешімі бойынша 2015 жылы жалпыхалықтық оқуға І.Есенберлиннің «Көшпенділер» трилогиясы таңдалды.

2015 жылдың желтоқсанның 2-сі күні абонемент бөлімінің   ұйымдастырумен «Бір ел-бір кітап» акциясы аясында ұлттық рухты оятқан ұлы шығармаларды дүниеге әкелген жазушы І.Есенберлиннің туғанына 100 жылдық мерейтойына орай жазушының «Көшпенділер» трилогиясынан оқырмандар конференциясы өткізілді.

Конференцияға кітапханамыздың  тұрақты оқырманы «Көшпенділер» трилогиясының толық нұсқасын оқып шыққан  Нүркенов Мыржақып атамыз,  «Руханият» клубының мүшесі, тарихи өлкетану мұражайының ғылыми  қызметкері Сағынтаев Батырлан және Ы.Алтынсарин атындағы педогогикалық институтының студенттері мен Н.Құлжанова атындағы колледж студенттері қатысты.

Қазақ хандығының құрылғанына 550 жыл толуы кезеңімен тұспа-тұс келген кезеңде «Көшпенділер» тарихи шығармасын ел болып оқып, танысып, талқылаудың жас ұрпақты патриоттық рухта тәрбиелеуде маңызы зор...

Қазақ жұртының жеті жүз жылдық тарихын хатқа түсіріп қалдырған тұғыры мықты тума талант І.Есенберлин ұлтымыздың тарихын тереңінен қозғап жазған белгілі романдарында: ол қазақ хандарының батырлары мен билерінің, ақылшы абыздарының бітім-болмысын жан-жақты суреттеген.Іс-шараны Сағынтаев Батырлан Қадыр Мырза-әлидің І.Есенберлинге арналған өлеңімен  басталды. «Ақбота» би ансамблінің орындауында «Көшпенділер»биі орындалды. Арнайы дайындалған бейне жазбадан жазушының өмірбаянымен  оқырмандарды таныстырды.Ілияс Есенберлиннің ұлт тағдырына қатысты шетін сырлары мен идеялары кемел деңгейде көрінетін бұл эпопеяның алғашқы бөлігі «Көшпенділер» трилогиясын студент балалар терең талқылады.

                    Конференция сұрақтары:

1.Үш кітапты біріктіріп тұрған қандай тақырып?

2.Қазақ хандығының Мұхмед Шайбани әулетімен, Бұхар хандығымен қарым қатынасы қандай болды?

3.Ақтабан шұбырынды,Алқакөл сұлама оқиғасы туралы не білесің?

4.Абылайдың орындай алмаған арманы.

5.Хандардың дұрыс саясат жүргізуіне көмектескен жыраулар туралы ?

6.Қандай қазақ батырлардың бейнесі молынан қамтылған?

7.Трилогияда тарихи деректерді қайдан алды?

8.Кенесары қазақтың соңғы ханы екенін дәлелде.

9. «Көшпенділер» трилогиясы соңынан басына қарай жазылған. Бұл қаншалықты рас?

10. «Көшпенділер» фильмі Қазақстанда қашан түсірілді,Басты рольді сомдаған актер?

Сұрақтар бойынша белсене қатынасқан студенттер:

АрқМПИ педогогика және филология факультетінің  3-4-курс студенттері- Досыбаева Салтанат,Куздибаева Гүлдана,Тұрсынхан Гүлназ, Шарасулова Махинур,Пұрханова Нұрила,Уатхан Маржан, Жәнібекова Гүлшат, Бекбаева Айгерім,Еркіман Қабыл.

Шығарма кейіпкерлері ретінде негізін тарихи тұлғалар, Шыңғыс хан дәуірінен басталып Кенесарымен аяқталатын қазақ мемлекетінің бастау көзі мен қиын-қыстаулы тағдыр-талайының басында тұрған хандар тізбегі, ел мұңы мен арман-тілегінің хабаршысы ақын-жыраулар, ел бірлігінің ұйтқысы, халықтың ақыл-парасатты билері, ел мен жер үшін, ұрпақ болашағы үшін қасық қаны қалғанша жаумен шайқасып отанын қорғай білген арыстан жүрек, атанжілік батырлар. Бұлар — ел есінде сақталып, тарихта қалған өмірде болған тұлғалар. «Көшпенділер» трилогиясы — партиялық идеологияның қылышынан қан тамып тұрған уақытта дүниеге келген шығарма екенін студет жастар дәлелдеп  өз ой-пікірлерін ортаға салды.

      Жазушының шығармаларынан «Көшпенділер  -  хандық дәуірдегі қазақ өмірінің энциклопедиясы»  атты кітап көрмесі ұйымдастырылып, оқырмандарға шолу жасалынды.