«Спорт – жаңа бағыт, жаңа серпіліс»

        Осы қыстың еліміз үшін басты жаңалығы – Алматыда өткен 28-шы қысқы Универсиада ойындары. Бірінші рет, қазақ жерінде, осындай үлкен халықаралық дәрежеде студенттік қысқы ойындар өтті. Еліміз үлкен жауапкершілікпен, абыроймен бұл спорттық универсиаданы жоғары дәрежеде өткізді.

      Кітапхананың өнер бөлімінде осы үлкен спорттық шараға арналған  «Спорт – жаңа бағыт, жаңа серпіліс» тақырыбында қызықты хабарлама сағаты өтті. Хабарламаның басында Универсиада ойындарының тарихына, Қазақстанда өткен дүниежүзілік спорт додасына кеңінен тоқталдық. Мемлекет басшысы Нұрсұлтан Назарбаевтың қатысуымен өткен Универсиада ойындарының ашылуы  сөз болды. Универсиада ойындарының алауы еліміздің түкпір-түкпірін аралап, Алматыға жеткізілген болатын.

Бір айтып кететін жәйт, Қостанай облысының атынан, біздің қаланың қос спортшылары, Арқалық Мемлекеттік педагогикалық институттың студенттері – Аян Байзақов пен Антон Цуркан Универсиада алауын ұстауға ие болды.

Одан әрі Универсиадаға қатысқан елдердің спортшыларына, жүлдегерлерге берілетін ақшалай сыйлықтардың көлемі, спорттың неше түрі және сарапқа салынған медаль жиынтығы туралы ақпарат берілді.

    Алматы Универсиадасына әлемнің 57 елінен 2000-нан астам спортшы келді. Тікелей таратылған телехабарға әлемнің 80 елі, миллиондаған көрермен куә болды. Барлығы 11 күнге созылған жарыста қысқы спорттың 12 түрінен 85 медаль жиынтығы сарапқа салынды.

Бәсекенің басты кейіпкерлері, жас спортшылар туралы жеке-жеке айтылды. Отандастарымыздың жетістіктерін зор мақтанышпен сөз еттік. Осы жарыста, бір емес бірнеше рет, жеңіске жеткен спортшыларымыздың есімдері (Анна Шевченко, Галина Вишневская, Жанбота Алдабергенова, Жібек Арапбаева, Алина Райкова, Юлия Галышева, Екатерина Айдова, Дмитрий Рейхерд, Олжас Климин, Иван Люфт, т.б.) дараланып еңбектері айтылды.

     Қысқы спорттың ең әдемі түрі – ол мәнерлеп сырғанау. Осы спорттық жарысқа бөлек тоқталдық. Қазақстандық спортшылар Абзал Рақымғалиев пен Денис Тен туралы айтылды. Денис алтын медальға ие болғаны жайлы мақтанышпен әңгімеленді.

Дүниежүзілік спорттық бәсекенің нәтижесі бойынша, Қазақстан құрамасы 2-ші орынға ие болып, 36 медаль жеңіп алды (оның – 11-і алтын, 8-і күміс, 17-і қола жүлде. Келесі қыстық Универсиада 2019 жылы Ресейдің Красноярск қаласында өтеді.

     Хабарлама соңында студенттерге осы тақырып бойынша, сұрақтар қойылып ойын өткізілді. Шағын сый-сияпат көрсетілді. 

Іс-шараға қатысқан Торғай гуманитарлық колледжінің дене шынықтыру бөлімінің 2 курс студенттері белсенділік танытты.

Бөлімде тақырыпты сөре ұйымдастырылып, 8 кітап, 12 газет пайдаланылды.

    Хабарламаны дайындаған: бөлім кітапханашысы А. Тануева.